حوزہ نیوز ایجنسی کی رپورٹ کے مطابق، لبنان کے جنوبی علاقے صور کے بدياس شہر میں امل موومنٹ کے بانی کارکنوں میں شمار ہونے والے مرحوم ابراہیم خلیل کی یاد میں ایک تعزیتی اجتماع منعقد ہوا۔ یہ پروگرام حسینیہ میں منعقد ہوا جس کی صدارت انجینئر محمد خلیل نے کی۔
اس موقع پر لبنان کی پارلیمنٹ کے رکن علی خریس نے امل موومنٹ کی نمائندگی کرتے ہوئے خطاب کیا۔ انہوں نے مرحوم ابراہیم خلیل کو خراجِ عقیدت پیش کیا اور کہا کہ وہ اُن شخصیات میں سے تھے جنہوں نے امام موسی صدر کے راستے پر چلتے ہوئے مزاحمت کی بنیادوں کو مضبوط کیا۔
علی خریس نے کہا: "ہم امام موسی صدر کی گمشدگی کی سالگرہ کے قریب ہیں، یہ ایک ایسا جرم ہے جس میں دشمنانِ عربیت، اسلام اور مزاحمت شریک تھے۔"
انہوں نے مزید کہا کہ امام موسی صدر کی فکر اور پیغام آج بھی زندہ ہے اور ان کی تعلیمات لبنان کے داخلی مسائل کے حل، شہری امن، مذہبی ہم آہنگی اور اسرائیلی جارحیت کے مقابلے میں ہمارے لیے رہنمائی کا سر چشمہ ہیں۔
علی خریس نے زور دیا کہ امل موومنٹ ہمیشہ امام موسی صدر کے راستے پر قائم رہے گی اور مزاحمت کے عہد پر ڈٹی رہے گی۔ "یہ وہ راستہ ہے جو مؤمنوں کے خون سے شروع ہوا اور یہ امانت ہماری ذمہ داری ہے تاکہ لبنان باوقار اور محفوظ رہے اور امام موسی صدر کا پرچم ہمیشہ وطن کے دلوں میں بلند رہے۔"
آپ کا تبصرہ